Nagpanawagan ni House Deputy Minority Leader ken Akbayan Party-list Rep. Chel Diokno kadagiti kakadua na nga agpampanday linteg a dagus nga ipasa ti gakat a P200 daily wage hike.
Apela daytoy ni Diokno kalpasan ti panagirruar ti Pasig Regional Trial Court Branch 152 ti preliminary injunction kontra iti P85 a wage increase iti National Capital Region.
Makapaliday para ken ni Diokno a saan a maipatungpal ti nayon a sweldo bayat a naka-pending ti kaso iti korte isu a masapul nga ag-tignay a dagus ti Kongreso.
Nalawag iti Article 126 ti Labor Code a maiparit nga agirruar ti aniaman a korte ti Temporary restraining order uray preliminary wenno permanent injunction kontra iti aniaman a wage order.
Pinasingkedan ni Diokno a ti husto a proseso para iti panag-apela ti maysa a wage order ket adda iti Article 123 ti Labor Code, ken saan daytoy a maipila iti Regional Trial Court.
