VIGAN CITY – Nadungpar ti maysa a senior citizen babaen ti motorsiklo bayat iti panagballasiwna iti Quirino Blvd., Barangay Tamag, Vigan City, Ilocos Sur.
Ti nagmaneho ti color blue Yamaha Aerox motorcycle ket ni Adonis Quindag Quitoriano, agtawen iti sangapulo ket siam, baro, addan ti driver’s license nga agnaed idiay Don Alejandro Quirolgico, Caoayan kaduana ti menor de edad a back ride-na idinto a ti pedestrian ket ni Merlinda Amoyo Rosario, agtawen iti pitopulo ket dua, balo nga agnaed idiay Barangay Tamag, Vigan City.
Agpapabagatan a direksyon ti motorsiklo a napaspas ti patarayna idinto nga agballasiw nga agpalaud manipod daya a direksyon ti baket idin nadungpar ti motorsiklo.
Gapu dayta, agpapada a ndunor iti naduma-duma a paset ti bagi dagiti nagkalugan iti motorsiklo ken ti pedestrian isu a naipanda iti Ilocos Sur Provincial Hospital – Gabriela Silang, Tamag, Vigan City para ti pannakatamingda.
