Nadundunor ti maysa a senior citizen ta nadungpar iti nakamotorsiklo bayat iti panagballasiwna idiay Barangay Pangada, Sta. Catalina, Ilocos Sur itay alas syete kinse iti rabii, September 8, 2024.
Ti pedestrian ket ni Ellen Gonlivo Racho, agtawen iti innem a pulo ket siam, naasawaan nga agnaed idiay Barangay Caboloan, Sta. Catalina idinto a ti nagmaneho iti nalabbaga nga NMAX motorcycle ket ni Kristian Jeo Perucho Rabo, agtawen iti duapulo ket maysa, baro, estudyante, holder iti Non-Professional Driver’s License, nagaramat ti helmet nga agnaed idiay Barangay Poblacion, Sta. Catalina.
Nagballasiw ti pedestrian iti provincial road iti nasao a barangay manipod amianan a nagpabagatan idin nadungpar iti agpadaya a motorsiklo.
Gapu iti pannakadungpar ti pedestrian ket nagsagaba iti dunor iti nadumaduma a paset iti bagina a naipan iti Metro Cooperative Hospital, Bantay para iti pannakatamingna idinto a ti nagmaneho iti motorsiklo ket saan a naan-ano ngem naipan iti Gabriela Silang General Hospital, Vigan City para iti medical attention.
Naamoan nga agpada a saan a nakainom iti arak dagiti dua a nairaman idi napasamak iti aksidente.
