Agtaltalinaed iti ospital ti driver iti motorsiklo kalpasan a natulid gapu iti pannakadungparna iti naiwalang nga aso iti Bypass Road idiay Barangay Bagani Campo, Candon City, Ilocos Sur idi kalman, May 27, 2026.
Ti nagmaneho ti Honda Click 125 motorcycle ket babai nga agtawen ti duapulo ket innem, nurse nga agnaed idiay Barangay Casilagan, Narvacan.
Iti pannaki-uman ti Bombo Radyo Vigan ken ni PLt. Jovelyn Antalan iti Candon City Police Station, naammoan a bayat iti panagturong iti amianan a direksyon ti nakamotorsiklo ket kellaat a nagballasiw ti maysa nga aso manipod daya a nagturong iti laud a rason iti pannakadungparna.
Segun ken ni Antalan, gapu iti impact ket naawanan ti kontrol ti driver isu a naipan iti pavement iti kalsada a rason iti mapapati a nakaitamaan iti ulona iti baet a nakasuot iti helmet.
Kinuna ni Antalan a nagsagaba ti driver iti dunor iti ulo, akin-kannawan a rupana, na-fracture iti akin-kannawan nga imana ken nadunor dagiti tumengna isu a naipan iti Candon General Hospital babaen kadagiti nagresponde nga otoridad ngem nayakar iti Ilocos Sur Medical Center para iti naan-anay pay a pannakatamingna.
Naammoan a nag-blood clot ti ulo ti nasao a driver ngem pinasingkedan ti doktorna a maala pay iti agas dayta, idinto a ti aso a naatalan ket dagus a natay.
