Inakusaran ni Senador Risa Hontiveros dagiti opisial ti gobierno a tumultulong kadagiti POGO operator a mangliklik iti panangiparit ni President Marcos iti offshore gaming.
Segun kenkuana, dagiti opisial ti mangbalbalakad kadagiti POGO no kasano nga agpammarang kas legitimate business kas kadagiti resort ken restaurant.
Nagpanawagan ni Hontiveros kadagiti opisyal nga isardengdan ti panangtulong kadagiti POGO ken ipamaysada ti panangipatungpal iti pannakaiparit, kalpasan ti imbutaktak ni Interior Secretary Jonvic Remulla ti pannakaseknanna maipapan kadagiti POGO a mapan iti underground.
Mangisayangkat ti Senate women and children committee iti maudi a hearing inton November 26, a mangileppas iti makatawen nga imbestigasion iti industria ti POGO.
Naibutaktak ti imbestigasion no kasano nga inusar ni dati a mayor ti Bamban, Tarlac a ni Alice Guo ti fake citizenship tapno agkandidato ken makaipatakder iti POGO hub iti ilina bayat ti mapapati a panag-spy na para iti China.
