Nangipasan ni Senador Francis “Chiz” Escudero ti palawagna iti Commission on Elections (COMELEC) maipanggep iti PhP30 million a donasyon iti kampaniana manipud ken ni Lawrence Lubiano, Construction Executive ti Centerways Construction and Development Inc. idi 2022 National Elections.
Binilin ti COMELEC ni Sen. Escudero nga ipalawagna no ti nasao a donasion ket nagtaud ken ni Lubiano ket maitunos iti linteg a mangiparit kadagiti nakakontrata iti gobierno a mangipaay ti kontribusyon kadagiti kampania.
Segun ken ni Atty. Ramon Esguerra, abogado ni Sen. Escudero, nailanad a nasayaat ti donasyon iti Statement of Contributions and Expenditures (SOCE) ni Escudero, ken maitunos kadagiti pagannurotan.
Kinuna met ni COMELEC Chairperson George Garcia a sukisoken ti Political Finance and Affairs Department (PFAD) iti sungbat ti senador tapno maamoan no naglabsing iti linteg.
Innayon pay ni Garcia nga imbitarenda pay ni Lubiano tapno agpalawag maipanggep iti donasion kas panangkitada a nasayaat no husto ti depensa ni Escudero iti salinong ti Section 95 ti Omnibus Election Code a mangiparit ti kontribusion manipud kadagiti indibidual wenno kompania a nakakontrata iti gobierno. – Augie Arellano
