Impila ni Senador Imee Marcos ti Senate Bill No. 2067 wenno gakat a mangitantan ti Barangay ken Sangguniang Kabataan Elections (BSKE) manipud iti Nobiembre 2026 a mapan iti Oktubre 2027.
Daytoy ket gapu iti nangato a plete dagiti pasahero gapu iti nangato a presio ti produkto petrolyo.
Iti gakat, agtultuloy ti serbisio dagiti opisial ti barangay, maysa a dakkel a tulong tapno mapokusan da ti panagsungbat iti kasapulan ti komunidad da iti tengnga ti krisis.
Kalaksidan daytoy, nai-punto pay nga umabot iti P16 bilyon ti magastos para iti BSKE segun iti Commission on Election (COMELEC), kalaksidan pay ti nayon a gastos iti Philippine National Police (PNP), Department of Education (DepEd) ken lokal a gobierno.
Pinasingkedan ni senador Marcos a nasaysayaat no mausar pay laeng ti nadakamat a binilyon a budget iti panangited ti kangrunaan a kasapulan dagiti Pilipino kas ti taraon, krudo ken dadduma pay a serbisio.
