Kinumpirmaran ni Senate President Vicente “Tito” Sotto III a namin-ano a darasnan a pinadas a kontaken ni Sen. Bato dela Rosa ngem awan iti naawatna a sungbat manipod iti senador manipod saan a dimmar-ay kadagiti session iti Senado manipod November idi napan a tawen.
Segun ken ni Sotto, nagipatuloden iti dua agingga tallo a text messages ken ni dela Rosa kalpasan a pimmanaw iti Senate group chat.
Kinunana a naudin a kinontakna ni Dela Rosa iti napalabas a dua a bulan, saan laeng a kumustaen no diketdi tapno agyaman kalpasan a nagsarak iti pamiliada iti maysa nga event idiay General Santos City.
Pinasingkedanna a nag-text isuna ken ni dela Rosa maipanggep ti 2026 national budget ta agserserbi ti senador a vice chair iti Senate committee on finance ken nadutokan a miembro ti bicameral conference committee.
Inlawlawag ni Sotto nga awan ti bileg ti Senado a piliten ti maysa a miembroda a sumrek iti trabaho agingga agtultuloy iti panagtrabaho iti opisinana.
Maipalagip a nangrugi a saan a dimmar-ay ni Dela Rosa kadagiti session kalpasan nga imbutaktak ni Ombudsman Jesus Crispin Remulla a mapapati a nangiruar ti International Criminal Court (ICC) ti warrant of arrest kontra ti senador.
Ni Dela Rosa ti immuna a hepe ti Philippine National Police iti salinong ti administrasyon ni dati a Pres. Rodrigo Duterte ken nangidaulo ti kampania kontra droga a nakatayan iti rinibo a mapapati a karaman iti illegal a droga.
