Imbasura ti Pre-Trial Chamber 1 iti International Criminal Court (ICC) ti kiddaw ti depensa ni dati a Pres. Rodrigo Duterte a palubosan ida nga yapela ti nagbalin a desisyon maipanggep kadagiti kaso a “crimes against humanity” maipanggep iti war on drugs campaign iti dati nga administrasyon.
Iti 12 pages desisyon, agkakadua nga imbasura ti tallo a hukom a da Presiding Judge Iulia Antoanella Motoc, Judge Reine Adélaïde Sophie Alapini-Gansou, ken Judge María del Socorro Flores Liera ti kiddaw a depensa ti dati a presidente.
Segun ti kampo ni Duterte, nalawa unay ti sakup dagiti kaso ngem segun iti Prosecution, husto iti panangidatag ti korte iti sakup dagiti kaso ti dati a presidente ken naipalawagda dagiti nagbasaranda nga ebidensya a naaramat iti desisyon.
Kinuna pay ti depensa a saan nga umdas ti palawag ti korte iti ebidensya a naaramat ngem kinuna ti prosecution a sinurot ti Pre-Trial Chamber ti husto a proseso ken saan a rumbeng a saggaysaen ti amin nga ebidensya iti nagbalin a pangngeddengda.
Maipalagip nga idi April 23 ket kinumpirmaran ti ICC dagiti kaso kontra ken ni Duterte maipanggep iti mapapati a pammapatay iti salinong ti kampaniana kontra iti illegal a droga, pakairamanan dagiti insidente manipod idi mayor pay laeng idiay Davao City agingga nagbalin a presidente.
