Imbilin ni Philippine National Police Chief General Jose Melencio Nartatez Jr. ti nainget nga imbestigasyon iti mapapati a secret meeting iti nagbaetan dagiti kabagyan dagiti mapukpukaw sabungero ken dagiti naikkat a polis a mainanaig iti nasao a kaso.
Segun ken ni Nartatez, saan laeng a panangsalungasing ti mandato iti maar-aramid a tignay iti ruar iti PNP no diketdi panangdadael ti talek dagiti tao a pagserserbianda.
Naammoan a maysa ti kaso iti missing sabungero kadagiti kakontrobersyalan ken saan a nasolsolbar nga imbestigasyon iti pagilian kalpasan a napukaw iti sumagmamano a mannadi idi 2021 agingga 2022.
Immunan nga imbutaktak ti Napolcom iti mapapati a pannakairaman iti dua a polis iti panangpadaras dagiti nalimed a taripnong iti nagbaetan dagiti kabagyan dagiti mapukpukaw a sabungero ken dagiti naikkat a polis.
Kinuna ti PNP a kagiddan ti imbestigasyon iti National Police Commission (NAPOLCOM) ti isay-sayangkat nga internal probe iti uneg ti organisasyon.
