Nakemmeg ti National Bureau of Investigation (NBI) ti sangapulo a tattao a nairaman iti illegal sex trade babaen ti Telegram platform.
Nabigbig dagiti nakemmeg a da Shuang Yuan Wang, Shao Jian Yong, Fung Jie Sin, Huang Qi, Huang Shuai, Liu Ze Jun ken Rochelle Maglanque Magat, Ma Jessica Buenaventura, Justin Caladiao Cao ken Faiudz Abdula Maguindao.
Segun kenni NBI Director Jaime Santiago, natiliwan dagitoy iti Shore Residences Pasay City.
Duapulo ket pito (27) a biktima ti human trafficking met ti insalakan ti NBI, innem kadagitoy ket menor de edad, ken naipandan iti DSWD para iti umno a pannakakustodia.
Kabayatanna, dua pay a ganggannaet a da Chresto Jun Saligumba ken Renier delos Reyes ti natiliwan met ti NBI nga agus-usar iti Facebook account a “SLIM” para iti sex trade kadagiti menor de edad a Pinay.
Isagsaganan ti NBI ti kaso a maipila kontra kadagiti nakemmeg a suspek gapu iti panaglabsingda iti Anti Trafficking in Person Act of 2022 ken Cybercrime Prevention Act of 2012.
