Inruar ni President Ferdinand Marcos Jr. iti executive order a mangsuspenso iti importation iti regular milled ken well-milled rice manipod September 1 agingga October 30, 2025.
Napirmaan iti Executive Order 93 babaen ken ni Executive Secretary Lucas Bersamin idi Biernes ken nairuar idi kalman.
Maibasar iti bilin, mailaksid manipod innem a pulo nga aldaw a suspension ti specialty rice varieties a saan a masansan nga aggapu kadagiti local farmers.
Impakaammo ni Marcos ti suspension iti rice importation bayat ti state visit-na idiay India ita a bulan.
Ti sakup ti suspension ket mabalin a mapabiit wenno mayatiddog depende nu kasapulan apaman ti rekomendasyon iti Department of Agriculture (DA), Department of Economy, Planning and Development (DepDev), ken Department of Trade and Industry (DTI).
Nabilin dagiti nasao nga ahensia nga agtaripnong iti uneg iti tallopulo nga aldaw apaman iti pannakaipatungpal ti bilin nga ag-evaluate iti epekto iti suspension iti importation iti suplay ken presyo iti bagas iti pagilian, ken iti uneg iti sangapulo ket lima nga aldaw ket masapulda iti agipasa ti joint recommendation iti presidente babaen ti Executive Secretary.
