Nagiruar ti bilin ti Korte Suprema a mangibilbilin iti Malakanyang nga ag-komento para iti mandamus nga impila ni dati nga House Speaker Pantaleon Alvarez.
Ti nadakamat a petision ket agkidkiddaw nga obligaren ni Presidente Ferdinand Marcos Jr. a dumalan iti pisikal ken mental nga examination, pakairamanan ti hair follicle drug test.
Karaman iti kiddaw ti petision ti direktiba nga iyir-ruar iti publiko ti maysa a medical report a naglaon ti resulta ti examination.
Naikkan ti sangapulo ng aldaw ken saanen a mabalin nga iyatiddog dagiti respondent manipud iti oras a panagawat ti abiso tapno agipasa ti komento-da.
Ti addang ti Korte Suprema ket manglukat ti naun-uneg a patangan mainaig iti transparency ken accountability ti kangatoan nga opisial ti pagilian.
