Siguradoen ti National Food Authority (NFA) a dagiti laeng lehitimo a mannalon ti mairanud iti naituding a P30 kada kilo a buying price iti irik tapno maliklikan iti posible a panagabuso dagiti traders.
Segun ken ni NFA Administrator Larry Lacson, ti panagpangato ti purchasing price ket tignay iti nguin-ngina a gastos iti produksyon ken ti presyo iti fuel a makaapektar iti sapul dagiti mannalon.
Tapno amsigurado a saan a malusotan dagiti middleman wenno trader ti sistema, inlawlawag ti NFA a kasapulan a rehistrado dagiti agilako iti Registry System for Basic Sectors in Agricuture (RSBSA) iti Department of Agriculture, wenno adda sertipikasyon manipod municipal agriculture office nga isuda ket pudno a mannalon.
Malaksid dayta ket adda pay farmer’s desk kadagiti buying station a mabalin a mamonitor iti publiko iti panaggatang ti irik kas paset ti transparency ken citizen participation audit.
Maipan pay iti bulletin board ti nagan dagiti mannalon a nagilako iti apitda.
