Saan a lapdan ni President Ferdinand Marcos Jr. dagiti gabinete a mapaawagan iti maikadua a panagdenggeg iti Senado maipanggep ti pannakakemmeg ni dati a President Rodrigo Duterte.
Segun ken ni Palace Press Officer Atty. Claire Castro, kasapulan a masungbatan dagiti saludsod a maibatbato kadakuada tapno mapaneknekan nga awan ti madi iti naaramid a panagkemmeg.
Kiddaw laeng ti Malakanyang iti Senado a saan a malabsing ti executive privilege iti maaramid a panagdenggeg.
Inton Huebes iti intuding ti Senate Committee on Foreign Relations para iti maikadua a panagdenggeg iti nagbalin a proseso iti pannakakemmeg ti dati a presidente nga idadauluan ni Senador Imee Marcos.
Immunan nga impaganetget ti Malakanyang nga adda executive privilege ti presidente ken executive officials iti salinong ti konstitusyon tapno salakniban iti aniaman a sensitibo nga impormasyon kas ti operational details iti panangserrek iti sabali a branch iti gobierno.
