Inallukoy ni President Ferdinand Marcos Jr. dagiti Pilipino a taripatoen ken annadan iti kabaybayan kagiddan ti panagrambak ti Maritime and Archipelagic Nation Awareness Month (MANA MO) 2025.
Impalagip ni Pres. Marcos a ti baybay ket nabayagen a paset iti pakasaritaan iti pagilian manipod iti panagbiahe ken trade agingga iti panangisalakan iti soberanya dagiti Pilipino kontra kadagiti gangannaet.
Segun ken ni Marcos, ti kabaybayan ket napateg a baknang iti Pilipinas a pagtataudan iti taraon, sentro iti trade ken tulbek iti panagdur-as iti ekonomia.
Siguradoen ti presidente nga agtultuloy iti panangiduron iti gobierno ti tulong iti National Maritime Council ken Presidential Office for Maritime Concerns, dagiti programa a makatulong iti agrikultura, enerhiya, negosio ken agham nga adda pakainaiganna iti kabaybayan.
Nagpanawagan pay ni Marcos kadagiti institusion, lokal a gobierbo ken umili nga agtitinnulong iti panangtaripato iti kabaybayan tapno pakairanudan iti agdama ken kadagiti sumaruno a henerasyon.
