Impasigurado ti Philippine National Police (PNP) ti naan-anay a suporta ken tulongda iti agtultuloy nga imbestigasyon kadagiti flood control project ti Department of Public Works and Highways (DPWH) iti nadumaduma a paset ti pagilian, kas sungbat iti panawagan ni Presidente Ferdinand R. Marcos Jr. para iti napudno, naurnos, ken kinaawan a kurapsion a pannakaipatungpal dagiti amin a proyekto ti imprastruktura ti gobierno.
Segun ken ni Acting Chief PNP, Police Lieutenant General (PLtGen) Jose Melencio Nartatez, Jr., nakasagana ken alerto amin a police units iti intero a pagilian a mangipaay iti seguridad ken proteksion gapu ta aktibo a mangisayangkat dagiti personnel ti DPWH iti inspeksionda kadagiti nadumaduma a flood-mitigation site wenno lugar a pakaimplementaran dagiti proyekto tapno makissayan ti epekto ti layus.
Innayon ni PLtGen. Nartatez, Jr. a napateg ti akem ti PNP a mangipasigurado iti kinatalged saan laeng a ti publiko, no di pay ket dagiti nasao a proyekto a dakkel ti maitulongna kadagiti kagimungan iti panangsango ken panangsungbatda kadagiti parikut ken karit a patauden ti nalawa a layus.
Nangipaulogen ni Nartatez, Jr. iti pammilin kadagiti amin a regional ken local police office a dagus a makiuman ken makikoordinar iti DPWH ken lokal a gobierno tapno masigurado ti naurnos, natalna, ken natalged a panagbisita ken panangsukimat kadagiti amin a flood-control site a sakupen ti area of responsibility-da. Augie Arellano
