Duapulo ket uppat nga oras laeng ti inted ti Korte Suprema kadagiti respondents mainaig iti tallo a petisyon a naipila tapno pasublien iti pagilian ni dati a President Rodrigo Duterte.
Dayta ket kalpasan a nakaawat ti Supreme Court iti tallo nga agsisina a petisyon manipod kadagiti agkakabsat a da Davao City First District Representative Paolo Duterte, Mayor Baste Duterte ken dati a presidential daughter a ni Kitty.
Segun ti Korte Suprema, napagkakadua iti tallo a petisyon a naipila kadagiti agkakabsat.
Nabilin dagiti respondents nga agpalawag iti uneg iti duapulo ket uppat nga oras nu apay a saan nga agiruar ti Supreme Court ti writ of habeas corpus a kidkiddawen ti petitioners.
Dagiti respondent iti petisyon ket da Executive Secretary Lucas Bersamin, Department of the Interior and Local Government wenno DILG Secretary Jonvic Remulla ken Philippine National Police wenno PNP Chief General Rommel Marbil.
