Nakikaysa ni Presidente Ferdinand Marcos Jr iti selebrasion dagiti umili ita nga aldaw ti Domingo Sabet, kas paset iti panagleppas ti Semana Santa ken ti sagrado a proklamasyon ti panagungar ni Kristo.
Iti maysa a mensahe, pinasingkedan ti presidente a mailagip iti nasao nga okasion a ti panagrigat ket saan nga isu ti pagturposan ti amin, no di ket rugi ti panagbalbaliw, panagkaykaysa, namnama ken panangisakit iti pada a tao.
Iti panagungar ni Kristo, tinungpalna ti karina ken uray iti sipnget ket addanto latta lawag kadagiti mamati.
Nagpanawagan ti presidente iti kada Pilipino a bumangon nga adda baro a gagem, saan a sumuko, ken adda nauneg a responsibilidad para iti tunggal maysa.
Inyawisna pay ti pannakaitag-ay ti pagilian babaen iti panagkaykaysa ken pigsa, ta no aramiden daytoy ket awan ti pannubok a saan a malasatan.
