VIGAN CITY – Tallo a tama iti paltog iti nakatayan ni Ric Abalos nga agtawen ti uppat a pulo ket dua, mannalon nga agnaed idiay Barangay Callitong, Burgos a kas maibasar iti pannaka-autopsy iti bangkay na idi kalman.
Malaksid iti dayta, nadunor pay iti lapayag ti biktima.
Idi agsapa idi kalman, nasarakan iti bangkay ti biktima a nakaindayon iti sirok ti balete iti sanguwanan ti sari-sari store iti pamilya da.
Segun ken ni Police Captain Daniel Burgos, hepe ti Burgos municipal police station, im-imbestigaranda pay laeng no ania iti posible a motibo iti napasamak a pammaltog agsipud ta awan iti nakairamanan ti biktima a riri ken awan iti rekord na kadagiti otoridad.
Inpagarup dagiti kaarruba ti biktima a paputok laeng dagiti nangngeg da isu a saan da nga inkaskaso ket saan da nga inpagarup a napaltuganen ti biktima.
