VIGAN CITY- Addan ti pamalpalatpatan dagiti pannakabagi ti linteg iti imbestigasyon inaig iti pannakapapatay ni Jose Beleno Perlas, agtawen ti pito pulo ket uppat, naasawaan, dati nga Overseas Filipino Worker (OFW) a taga Balaleng-Amianance, Bantay ta pinaltugan ti saan a nabigbig a suspek iti batog ti pagtaenganda idi rabii ti January 24, 2019, ngem saan pay a mabalin a maibuksilan iti publiko.
Segun kenni Police Senior Inspector Leonilo Ancheta, officer-in-charge ti Bantay municipal police station, no pay addan ti makitkita da nga anggulo iti krimen ket kiniddaw da ti tulong dagiti testigo nangruna ket dadael ti CCTV iti gasolinaan iti batog ti pagtaengan ti biktima .
Maipalagip a nakalugan ni Perlas iti honda CRV na a nakaparking iti batog ti pagtaenganda idi pinaltugan dagiti suspek ti ulo na ket dukduktalen pay laeng dagiti otoridad ti paltog a nausar ta maysa laeng nga slug ti naala da iti nakapasamakan ti krimen.
