Imbilinen ti Pre-Trial Chamber I ti International Criminal Court ti prosecution ken defense team a rugian ti panangiruar ti ebidensya mainaig iti kaso a crimes against humanity ni dati a President Rodrigo Duterte.
Segun ti ICC, gagem ti nasao a progreso a masigurado a ni Duterte ket napakaammoan iti ebidensya nga idatag ti Prosecutions iti confirmation hearing.
Inted ti Pre-Trial Chamber ti prosecution ti agingga April 4 tapno ilatag ti dadduma a documentary evidence kas kadagiti ladawa, video, audio recording ken transcript a maaramat iti kaso.
Kasaruno dayta ket maipaay agingga April 11 iti defense team tapno pakaammoan ti Chamber ken ipakita iti prosecution nu mangted ti alibi ken nu mangisayangkatda iti bukodda nga imbestigasyon sakbay ti confirmation hearing.
Agingga April 2 met iti ited ti ICC Registry tapno asikasoen ti proseso mainaig kadagiti biktima ken testigo a sumangsango iti panagdenggeg pakairamanan ti application forms, identity documents ken legal representations.
