Maysa ti natay iti panagdinnungpar dagiti dua a motorsiklo iti national highway ti Barangay Pug-os, Cabugao, Ilocos Sur.
Nabigbig ti nagmaneho iti SYM motorcycle a ni Ralph Justine Baclig Domingo, agtawen iti duapulo ket maysa, kinalubbonna ni Jasmine Agtubong Tabil, agtawen iti sangapulo ket walo, agpada a taga-Pug-os, Sinait.
Ti met drayber ti Red Honda Click 150 motorcycle ket ni Ronald Rubina, taga-Barangay Immayos Norte, San Juan.
Agpapa-amianan ti SYM motorcycle, ket idi magtengda ti nakapasamakan ti aksidente, immagaw ti linya ti drayber ti Honda Click isu a nagdinnungparda.
Nadunor ti ulo dagiti nagkalubbon iti SYM a motorsiklo isu a naitarayda iti ospital ngem dead on arrival ti drayber.
Ti met drayber ti Honda Click ket nadunor met laeng ti ulona a naipaagas iti Suero General Hospital, Cabugao ngem nayakar idiay Mariano Marcos Memorial Hospital, Batac City, Ilocos Norte.
Dagiti drayber ket saan a nakainom idi mapasamak ti aksidente.
