VIGAN CITY- “Awan iti baro a pagannurutan iti panangala dagiti kameng ti media ti police blotter ta sursuruten da iti media relations manual a naiparuar idi 2014 ” dayta ti inlawlawag ni Police Chief Inspector Winnie De Vera, Officer In Charge ti Police Community Relations ti Ilocos Sur Police Provincial Office.
Segun kenni De Vera, uray no adda ti inpost ti ISPPO iti social media inaig iti panangala ti police blotter, kayat da laeng nga ipalagip ti memorandum circular a no kayat ti media ti mangala ti spot report ket kasapulan da ti request,nangruna no manarimaan pay laeng ti imbestigasyon.
Inlawlawag na a mabalin a mangted ti ISPPO ti detalye iti maysa nga insidente ngem trabahon ti kameng ti media a mangisayangkat ti follow up kadagiti maseknan a municipal ken city police station.
Nagyaman ni De Vera ta naikkan da ti gundaway a nangilawlawag iti post da iti social media ket namnamaen na nga agtultuloy ti napintas a langen ti media ken police community relations office inaig iti panangidanun iti impormasyon iti publiko kadagiti mapaspasamak ditoy probinsya.
Inaklon met ti PCR chief nga adda nagkurangan da iti panangipost kadagiti situational report nangruna itatta a mapaspasaran ti nepnep ngem inkari na a kasarita nanto dagiti administrator ti social media page da tapno ipost da ti kauddian a detalye iti sitwasyon ditoy probinsiya.
