Inallukoy ni Sen. Alan Peter Cayetano ti Philippine Amusement and Gaming Corporation (PAGCOR) nga ikkan ti bileg dagiti local government unit (LGU) nga iparit dagiti online gambling iti masakupanda nu isu ti kayat dagiti umili.
Segun ken ni Cayetano, uray mabalin a ma-opt out dagiti siudad iti operasyon ti physical casinos ket awan ti kapada a mekanismo para ti online gambling.
Impaganetget ti senador nga uray maiparit ti pagsugalan iti dadduma a siudad kas idiay Taguig, agtaltalinaed a nagraira ti online gambling a mabalin a ma-access uray adda iti pagadalan wenno simbaan.
Kinuna ni Cayetano, idiay Taguig ket nabayagen a maiparit iti sugal ken aniaman a tradisyonal a maar-aramid iti natayan ta sungbatan ti LGU ken DSWD ti magastos iti punpon.
Kabayatanna, simmungbat ni PAGCOR Chairman Alejandro Tengco nga ad-adalen iti ahensya ti posible a panang-limitar ti designated stations iti panagpusta imbes a maipalubos a direkta kadagiti cellphone.
