Impangato ti Pag-IBIG Fund ti maximum housing loan-da iti P10 million tapno mayatiddog ti access dagiti mangmangged a Pilipino iti nalaka a long-term home financing.
Impakaammo dagiti opisyal ti addang idi May 26 a gagem a papigsaen ti Expanded 4PH Program iti administrasyon ken tignayan ti oversupply iti housing units kangrunaan idiay Metro Manila ken dadduma pay nga urban areas.
Iti salinong iti baro a polisiya, mabalin a makautang iti agingga P10 million dagiti kualipikado a miembro idinto nga agtalinaed ti subsidized 3% housing loan rate para iti socialized housing borrowers.
Segun ken ni DHSUD Secretary Jose Ramon Aliling a chairman iti Pag-IBIG Fund Board of Trustees, napateg ti addang tapno ad-adu a miembro ken mangmangged iti maaddaan iti pagtaengan iti asideg iti trabaho, pagadalan ken dadduma pay a pagkasapulan.
Nagpanawagan pay isuna kadagiti developer nga i-recalibrate iti presyoda, mangidiaya iti maikalintegan a packages, ken tulongan a pagbalinen a nalaka dagiti available unit para kadagiti miembro.
Impaganetget ti Pag-IBIG Fund CEO Marilene Acosta, agtaltalinaed a nalaka ti housing loans a mabalin a mabayadan iti agingga tallopulo a tawen, nga adda interesna nga umabot iti 5.75% depende iti loan terms.
Impaganetget pay iti ahensya a ti panagaprubar iti nangat-ngato a loan amount ket dumalan pay ti credit evaluation, collateral appraisal, ken dadduma pay a guidelines tapno masigurado a responsible iti panagpautang.
