Impakaammo ni Senate President Sherwin Gatchalian ti pannakabukel ti RISE Ad Hoc Committee a manamnama a mairugi inton sumaruno a lawas tapno makatulong a mangbiag manen ken mangpapigsa iti ekonomia ti pagilian.
Karaman iti daytoy dagiti chairperson dagiti nadumaduma a komite ti Senado tapno pagsasaritaan dagiti addang ken linteg a makatulong iti ekonomia.
Segun ken ni Gatchalian, nabuntog ti panagregta iti ekonomia kadagiti nabiit pay a kuarter gapu iti sumagmamano a karit iti ruar, isu a kasapulan a masimpa ken mataming babaen ti legislation.
Namnamaenna a mangipaulog ti komite kadagiti rekomendasion iti presidente, pakairamanan dagiti bill ken pondo para kadagiti programa kas iti micro, small and medium enterprises (MSMEs).
Kabayatanna, sinuportaran met ni Gatchalian ti Pax Silica initiative gapu iti potensial daytoy a mangparnuay iti panggedan ken mangparang-ay iti ekonomia, ngem inpettengna a nasken a masimpa ken mamonitor tapno masigurado a maganar dagiti Pilipino ken saan a makadangran iti aglawlaw. Kleofe Jyna Dayag
