Ibilang ni Defense Secretary Gilbert Teodoro Jr. nga extortion ken blackmail ti addang ti China kontra kadagiti Pilipino nga agtrabtrabaho idiay Hong Kong ken Macau.
Dayta ket kasaruno iti pakaammo dagiti operasyon ti China kontra kadagiti Pilipino a mapapati nga illegal nga agnanaed wenno agtrabtrabaho iti pagilianda.
Mapapati a naisayangkat ti operasyon kas tignay ti China iti nagbalin aksyon ti Pilipinas kontra iti sumagmamano a Chinese nationals a karaman iti illegal nga operasyon iti pagilian.
Maipalagip a sumagmamano kadagiti naisayangkat nga operasyon iti Pilipinas kontra kadagiti Chinese national ti pannakakemmeg iti nasurok innem a pulo a Chinese nationals iti maysa a hazardous steel plant idiay Misamis Oriental a na-raid idi Mayo iti agdama a tawen.
Kondenaren ni Teodoro ti panagpanggep ti China a makibiang iti maipatpatungpal a linteg iti Pilipinas.
Kinunana a ti pannakakemmeg kadagiti Chinese national ket naisayangkat maibasar ti search warrants nga inruar ti korte ken naisayangkat iti legal a proseso.
