Namakdaar ti Federation of Filipino-Chinese Chambers of Commerce and Industry, Inc. (FFCCII) a posible a bumales ti China iti Pilipinas no maideklara kas persona non grata ni Chinese Ambassador Jing Quan.
Indagadag ni FFCCCI President Victor Lim iti gobierno ti Pilipinas ken ti embahada ti China a makisaritada tapno mapalag-anan ti tension ken maliklikan ti pannakaapektar ti panagtagilako iti nagbaetan dagiti dua a pagilian.
Sumagmamano a senador ti nangipila iti resolusion a mangidawdawat ken ni Presidente Ferdinand “Bongbong” Marcos Jr. nga ideklara ni Jing a persona non grata wenno kiddawenna iti China nga isublida isuna kalpasan nga imbagana a nalaka nga agballigi ti Beijing no agusar iti puersa kontra iti Pilipinas.
Indanon ti Department of Foreign Affairs (DFA) ken ni Jing ti napigsa a panagkedked ti Pilipinas kadagiti saritana, idinto nga impaima ti Malakanyang ti ahensia ti panangikaso iti nasao a banag ken ti tarigagay ti Presidente a mangtaginayon iti nasayaat a relasion ti dua a pagilian.
