Agbalinen a sangapulo nga aldaw ti Service Incentive Leave (SIL) manipod iti agdama a lima nga aldaw dagiti mangmangged a Pilipino no agbalin a linteg ti House Bill 10756 a pinutarni 4Ps party-list Rep. JC Abalos.
Segun ken ni Abalos, lima a dekada wenno limapulo a tawenen nga SIL isu a rumbeng a doblien isu nga impilana ti nasao a gakat tapno maikkan ti umdas nga inana dagiti mangmangged wenno maaddaan iti napapaut a panawen para iti pamiliana.
Kinunana a dagiti mangmangged ket saan laeng a paset iti workforce ta taoda a kasapulan ti umdas a panawen tapno aginana, agpalaing no adda sakitna, maasikaso ti personal a kasapulanda, ken akman iti responsibilidad ti pamilia.
Impaganetgetna a maipasa iti gakat iti kabiitan a panawen kas panangbigbig ti kontribusion dagiti mangmangged iti pagilian.
