Idurduron ni Senador Erwin Tulfo ti 20% discount iti mobile load ken internet services para kadagiti Pilipino nga estudyante tapno makatulong kadagiti pamilia a marigatan iti magastos iti online learning.
Iti salinong ti Senate Bill No. 2275 wenno Student Load Discount Act nga impila ni Tulfo, sakup ti diskuento ti mobile prepaid load, mobile postpaid plans ken mobile internet packages.
Gagem ti gakat a makissayan ti nayon a gastos dagiti estudyante ken dagiti nagannakda kangrunaan ita a masansan a mapilitan nga umakar iti online classes dagiti pagadalan gapu iti saan a nasayaat a panniempo.
Segun ken ni Tulfo, saan nga umdas ti dati a konsepto ti class suspension a mangipasimudaag nga awan ti klase ta adu a pagadalan ita ti agar-aramat ti online learning tapno maliklikan ti pannakataktak iti panagadal.
Sakup ti gakat dagiti Pilipino a naka-enroll iti elementarya, sekondarya, technical-vocational ken higher education, malaksid iti post-graduate studies.
