Imbutaktak ni Presidential Anti-Organized Crime Commission (PAOCC) Executive Director Benjamin Acorda Jr. iti maysa a Senate hearing a mapapati a nagpangta ti China a kemmegen dagiti Pilipino a mangmangged iti pagilianda no saan a waya-wayaan iti Pilipinas dagiti Chinese national a nakemmeg iti maysa nga operasyon idiay Misamis Oriental.
Segun ken ni Acorda, mapapati a naibaga kadagiti mangibagi iti Pilipinas a posible a makemmeg dagiti Pilipino idiay China kas tignay iti pannakakemmeg iti 69 Chinese national iti insayangkat a raid ti Philippine Sanja-Steel Corporation iti uneg ti PHIVIDEC Industrial Estate idiay Tagoloan, Misamis Oriental.
Naisayangkat ti operasyon babaen ti napagtipon a puersa ti gobierno nga indauluan ti PAOCC gapu kadagiti mapapati a panaglabsing iti immigration, labor ken environmental laws.
Iti panagdenggeg iti Senado nga indauluan ni Committee on Economic Affairs ni Senador Risa Hontiveros, nadakamat a nagprotesta ti Chinese Embassy idiay Manila maipanggep iti nasao nga operasyon.
Kabayatanna, saan a nadakamat ni Acorda no siasino manipod Chinese Embassy ti nagpangta ken no kaanno iti nasao a pasamak.
