Natalek ni House Speaker Ferdinand Martin Romualdez a dakkel ti maitulong iti panangpasayaat iti edukasyon iti pagilian iti addang ni Pres. Ferdinand Marcos Jr. nga ilatangan ti maysa a billion a pisos ti pagpatakder ti Child Development Centers iti 328 a narigat a komunidad iti pagilian.
Kinuna ni Romualdez a ti nasao a pondo ket paset ti Local Government Support Fund iti salinong ti 2025 national budget ken mangsigurado nga awan ti ubing a maibati maipanggep iti edukasyon.
Impaganetgetna a saan laeng a senior high school wenno college scholarship iti matutokan ta masapul a rugian iti pannursuro kadagiti ubbing.
Innayonna nga adu pay dagiti rumbeng a masimpa iti sistema iti edukasyon isu a nasaysayaat nu marugian iti nalawlawa a reporma iti panangsigurado a makaadal nga insigida dagiti ubbing wenno zero to 4 years old.
