Idurduron ni House Senior Deputy Minority Leader ken Mamamayang Liberal party-list Rep. Leila de Lima ti panagpataw iti nayon a buwis para kadagiti bilyonaryo ken maaramat iti maala a pondo para iti social service programs.
Impila ni de Lima ti gakat nga Ultra-Wealth Tax Act (House Bill 9274), a manga-amyendar ti sumagmamano a probision iti National Internal Revenue Code of 1997 (Republic Act 8424).
Segun ti agpampanday lintyeg, kasapulan ti government intervention tapno matignayan ti epekto dagiti pasamak a mangnaynayon iti rigat dagiti adu nga ordinaryo a Pilipino.
Kinuna ni de Lima a nakita kadagiti naglabas a bulan no kasano iti panawen ti krisis, ta iti baet a panagpangato iti presyo iti langis, taraon ken dadduma pay a magatang, maysa kadagiti rason iti nabuntog a panangipatungpal kadagiti kasapulan a reportma ken serbisyo ken pagkurangan iti pagalan iti pondo tapno matulongan dagiti apektado kangrunaan dagiti agkasapulan.
Iti salinong ti gakat, ti baknang a naglabes iti P1 billion ket mapatawan ti 1% a buwis, 2% met iti naglabes iti P2 billion ken 3% iti labes iti P3 billion.
Innayonna a ti pondo a maur-or manipod Ultra-Wealth tax ket ekslusibo a maaramat iti public health services, edukasyon, local government support fund social protection ken panagpartuat iti mastrekan a trabhaho ken pabalay.
