
Mapatta-patta a P1.73 million iti gatad iti naala a mapapati a shabu manipod iti maysa nga street level individual bayat ti search warrant operation dagiti otoridad idiay Maynganay Sur, Sta. Maria, Ilocos Sur.
Iti pannaki-uman ti Bombo Radyo Vigan ken ni PLt. Jenson Refuerzo a Deputy Chief of Police iti Sta. Maria Municipal Police Station, nabayag a minonitorda iti aktibidad ti suspek ket idi nakumpirmarda, isun ti panangisayangkatda iti operasyon.
Segun ken ni Refuerzo, ti suspek ket agtawen iti limapulo ket uppat, care taker iti talon iti nasao a barangay.
Iti nasao nga operasyon ket nasarakan iti kuarto ti suspek iti duapulo ket walo a piraso iti plastic sachet a naglaon iti maatap a shabu a ti tunggal pakete ket nasurok-kumurang tallo agingga lima a gramo iti kadagsenna.
Gapu dayta ket naala iti pakabuklan a 172.5 a gramo iti mapapati a shabu nga aggatad iti P1.73 million.
Saan laeng a drug paraphernalia ta naala pay manipod ti suspek iti maysa a cal. 45 a paltog.