Mapapati a personal a nagkiddaw ni Vice President Sara Duterte ti P125 million a confidential funds idi 2022 iti baet a saan pay a nagpaut iti posision wenno kalpasan laeng a sinukatanna ni dati a Vice President ken ita ket Naga City Mayor Leni Robredo, nga awan ti confidential fund allocation iti panawen ti innem a tawen a terminona.
Iti maika-sangapulo ket walo nga impeachment trial, kinumpirmaran ti Office of the Vice President Secretary ken Assistant Chief of Staff Lemuel Ortonio, ti pirma ni Duterte iti maysa a surat idi 2022 para iti Office of the President ken Department of Budget and Management (DBM).
Karaman iti makidkiddaw a pondo iti surat ti P125 million para ti confidential funds.
Inamin ni Ortonio, a naideklarar a maikadua hostile witness ti prosecution, iti impeachment court a ti P125 million ket inkeddeng ni Duterte ken saan dayta a nagtaud iti masansan nga administrative assessment wenno rekomendasyon iti budget division wenno dadduma pay nga administrative units iti OVP.
Iti direct examination ni Private prosecutor Mae Divinagracia, kinuna ni Ortonio a kiniddaw ti OVP ti DBM maipanggep ti gagem a panagaramat ti confidential funds sakbay nga ipasa ti Physical and Financial Plan (PFP) a kasapulan iti Joint Circular 2015-01 para iti amin a confidential funds allocations.
Iti salinong ti joint circular, amin nga alokasion ti confidential wenno intelligence funds ket rumbeng nga addaan ti PFP a mangipasimudaag a ti nasao a gatad ket mailatang iti programa, aktibidad ken proyekto.
Kinumpirmaran pay ni Ortonio a ti nasao a P125 million ket sibubukel a nairuar ken nagastos laeng iti uneg iti sangapulo ket maysa nga aldaw, manipod December 21 agingga December 31, 2022 maibasar ti mismo nga official liquidation report.
