Impasigurado ti Malakanyang a naan-anay ti pondo ti gobierno ita a tawen tapno saganaan ti super El Niño a manamnama nga agbalin pay a kumaro iti epekto na iti pagilian.
Segun ken ni Palace Press Officer Atty. Claire Castro, impakaammo ti Department of Budget and Management (DBM) nga adda pay ti P6.2 bilyon a pondo nga usaren ita a tawen ti Department of Agriculture (DA) para kadagiti mannalon ken mangngalap nga apektado ti El Niño.
Adda pay ti P38.83 bilyon a nakailatang iti National Disaster Risk Reduction and Management Fund (NDRRMF).
Kabayatanna, pinasingkedan ni Castro a manayonan pay ti pondo ti NDRRMF inton sumaruno a tawen ti P45.67 bilyon, kalaksidan ti budget na para iti quick response funds dagiti frontline agency, kasta pay ti National Food Authority ken National Irrigation Administration.
