Im-imbestigaranen ti Office of the Ombudsman no adda nalabsing a linteg ti dua a kompania nga adda pakainaigan ti solar energy nga impatakder ni Batangas 1st District Representative Leandro Leviste.
Segun ken ni Ombudsman Jesus Crispin Remulla, sakup iti imbestigasyon ti Solar Philippines Power Project Holdings, Inc. ken ti subsidiary-da nga SP New Energy Corporation (SPNEC) karamanen ti panaglakoan ti SPNEC shares ken ti koneksyon iti dua a kompania.
Kinunana a posible nga agresulta ti legal issues ti panagbukel ti subsidiary kalpasan a napaay a nangilako ti parent company-da.
Maibasar met kadagiti record, manipod 2023 agingga 2025, nagilako ni Leviste iti P22.259 billion a gatad ti SPNEC shares iti MGEN Renewables, ti renewable energy arm iti Meralco PowerGen Corp.
Ti sarita ti Ombudsman ket kasaruno iti pakaammo ni Energy Secretary Sharon Garin a patawan ti nasao a kompania iti P24 billion a muelta iti Solar Philippines kalpasan a nakanselar ti nasurok 11,000 megawatts a power contracts iti napalabas a dua a tawen.
