Impila ni Senador Imee Marcos iti Resolution 418 a gagem nga imbestigaran ti mapapati a $10 million a donasyon nga ingkari ti Pilipinas iti World Health Organization (WHO) babaen ti Department of Health (DOH).
Insaludsud ni Sen. Marcos iti $10 million a katukad ti 600 million pisos no napatpateg nga ilatang iti WHO iti nasao a kadakkel a gatad ngem kadagiti ospital ken health facilities a pakairanudan dagiti Pilipino.
Segun ken ni Marcos, agtaltalinaed a nadagsen ti parikot iti pagilian ti sistema iti salun-at, pakairamanan iti binilion nga utang iti PhilHealth iti DOH hospitals idinto nga umabot payen iti P18.49 trillion ti pakabuklan nga utang iti pagilian.
Impaganetgetna iti pagkasapulan a maimbestigaran no ti nasao a donasyon ket legal, naurnos ken mayannatup.
