VIGAN CITY – Inpakaammo ditoy Bombo Radyo Vigan ni Bombo International Correspondent Marilou Cabotage a taga- Aquib, Narvacan a nabayagen nga agtrabtrabaho idiay Saudi Arabia, iti kasasaad iti pada na nga OFW idiay Qais Bin Salim Area 91 Dammam nga agtawen ti dua pulo ket pito a taga- Ilagan City, Isabela ta malaksid a malmaltratoen dagiti amo na, aglalaok pay iti ar-aramiden da kenkuana.
Ti report ni Cabotage, inpakaammo na nga idi August 15, inpadas iti amo a babai ti biktima a selselan ti plastic a botelya ti mineral water ti mabagbagi na sa na inikkan ti chili powder ket pinakan da pay ti chili powder.
Malaksid iti dayta, inpadas da pay a selselan iti kutsilyo iti mabagbagi ti biktima ken invideo ti amo na a babai a lamu-lamo iti uneg ti kwarto da.
Innayon pay ni Cabotage nga idi August 20, pinagtalaw dagiti amo na ti biktima a lamu-lamo ket tuwalya laeng iti pinangabbong na iti bagi na.
Agsipud iti dayta, inbilin ni Cabotage ken ti biktima a saan na nga ipadpadlaw nga agpatpatulong kadagiti pada na a Pilipino kabayatan nga iremremedyo da iti panagawid na.
Ni Cabotage ket miyembro ti Saklolo ng mga OFWs Worldwide idiay Saudi Arabia a mangtultulong kadagiti OFW a malmaltratoen dagiti amo da.
