VIGAN CITY- Patien ni dati a department of health secretary Janet Garin a saan a nagimbestigar ti National Bureau of Investigation inaig ti kontrobersyal a dengvaxia vaccine no di ket naibasar da laeng kadagiti nangneg ken nabuya da a damdamag iti inpila da a kaso a technical malversation idiay Office of the Ombudsman kontra kenkuana, ni dati a presidente Benigno Aquino III ken dati a budget secretary Butch Abad gapu iti mapapati nga iligal a panangigastos da iti dengvaxia funds manipud iti Miscellaneous Personnel Benefit Fund savings ti DOH.
Ti pannakiuman ti Bombo Radyo Vigan, inpaganetget ni Garin a saan a naawatan ti NBI a ti MPBF savings fund ket saan a sakupen ti disbursement acceleration program ken mabalin nga usaren nga augmentation fund para kadagiti programa ti ahensya isu a nalawag nga awan ti napasamak a technical malversation.
Inpatangken na pay nga awan ti natibker a pagbasaran iti kaso a graft and corruption ta saan da a pinaboran ti Sanofi Pastuer no di ket pinili da ta isuda laeng ti manufacturer ken supplier ti dengvaxia a bakuna kontra iti dengue.
Nasdaaw met ti dati a health secretary iti addang nga inaramid ti NBI ta saan a naikkan ti gundaway nga agpalawag iti isyu a panaglabsing iti karbengan da iti due process.
Nupay kasta ket kaykayat na a maipilan idiay Ombudsman ti kaso tapno mapaneknekan a dimmmalan iti usto a proseso ti inpatungpal ti Aquino administration a dengue immunization program.
