Kiddaw ti maysa a negosyante iti pannakaisubli ti motorsiklona a natakaw bayat a nakaparking iti sangwanan iti pagtaenganda iti Tamag, Vigan City, Ilocos Sur.
Iti pannaki-uman ti Bombo Radyo Vigan ken ni Rosalina Bascao, napansinna laengen nga awanen ti motorsiklona idi kalman, June 3, 2025 iti agsapa isu nga idi saandan a masapulan ket inreportnan kadagiti otoridad.
Ti lugan a mapapati a natakaw ket Honda Beat, color yellow, ti plate number-na ket 1814CJ, addaan ti sticker a number 16 ken adda agsinanmata iti paset ti headlight.
Patienna a saan a napaandar wenno nakibin laeng iti motor a naipanaw ta nakalemmeg met ti tulbek ken uray ti duplicate na ket adda iti uneg iti pagtaenganda.
Numan pay kinitada iti CCTV footage kadagiti karrubada ket naladaw dagiti nakasave a video isu a saanda pay a nakita nu kasano iti pannakaala ti motorsiklo.
Panawaganna iti nangala nga isublina lattan ta ibilangna a binulodna laeng iti lugan ket saan a tinakaw.
VIDEO – ROSALINA BASCAO
