VIGAN CITY – Saan pay laeng nga innaganan ni Police Captain Roger Baling-oay, hepe ti Sta. Cruz municipal police station nu siasino iti nakemmeg da idi kalman a maysa kadagiti suspek iti panagtakaw idiay Barangay Mantanas, Sta. Cruz.
Ngem, uray pay kasta ket kinumpirmaran ni Baling-oay a ti suspek a nakemmeg da ket taga- Baguio City nga itan ket nakakustodiya kadakuada ken manarimaanen iti naun-uneg nga imbestigasyon da kenkuana tapnu maibutaktak na nu siasino dagiti kakadua na ken nu paglemlemmengan da.
Nakemmeg ti suspek babaen iti inwayat da a hot pursuit operation ken checkpoint ta nakita dagiti testigo iti nagluganan na a asul a Mitsubishi Montero a naduktalan nga ab-abangan da laeng gayam iti inaldaw segun iti akin-kukua iti lugan.
Idi alas sais singko iti agsapa idi kalman, nakaawat iti tawag ti Sta. Cruz PNP nga adda iti panagtakawan a napasamak iti nasao a lugar ket idi nagresponde da, naduktalan a nagna dagiti suspek iti sliding window iti umuna a kadsaaran ken ti terrace iti maikadua a kadsaaran iti pagtaengan dagiti biktima a da Samy kenni Arlene Vergara ket innala da ti maysa a cellphone nga aggatad ti sumurok-kumurang tallo pulo ribo a pisos ken naduma-duma nga alahas nga aggatad ti tallo pulo ket pito ribo a pisos.
