Dead on Arrival iti ospital ti maysa a participant ti Ilocos Sur Festival 2025 Motor Racing Open 2T category iti racing track wenno diversion road idiay Barangay Paratong, Sta. Catalina, Ilocos Sur.
Ti nagmaneho iti Modular drug bike ket ni Richmond Frial Pablico, agtawen iti duapulo ket dua, baro, estudyante nga agnaed idiay Barangay Balaleng Amianance, Bantay.
Iti pannaki-uman ti Bombo Radyo Vigan ken ni PLt. Marlon Martinez manipod Sta. Catalina Municipal Police Station, agturong iti laud a direksyon ti motorsiklo iti racetrack idin naawanan ti kontrol iti manibelana a gappuanan iti pannaka-aksidentena.
Segun ken ni Martinez, nagsagaba iti dunor ken fracture iti naduma-duma a paset ti bagi ken nadunor pay ti ulo ni Pablico isu a naipan iti Ilocos Sur Provincial Hospital – Gabriela Silang babaen kadagiti nagresponde a Rural Health Unit personnel iti ili ti Sta. Catalina ngem naideklarar a dead on arrival babaen ti attending physician-na.
Sinigurado ni Martinez nga imbestigaranda nu adda pay sabali a rason iti nasao nga aksidente.
Naamoan nga student permit laeng iti iggem ti driver idi napasamak iti aksidente.
Kabayatanna, insigida a kinanselar dagiti organizer iti motoracing kalpasan iti nasao nga aksidente.
VIDEO – PLT. MARLON MARTINEZ
