Pagan-annaden ti Department of Migrant Workers (DWM) dagiti overseas Filipino workers (OFWs) mainaig iti ‘third country recruitment’ schemes dagiti illegal recruiters ken sindikato a nagwaras kadagiti social media platforms.
Segun iti DMW, nakaawatda kadagiti report manipud iti Philippine Embassy idiay Abuja, Nigeria mainaig kadagiti insidente ti human trafficking a pakairamanan dagiti Filipino nationals idiay Nigeria ken dadduma pay a pagilian iti West Africa.
Nabigbig ti DMW ti maysa a grupo dagiti Pilipino a nakemmegh idiay Abuja ken Lagos gapu iti pannakairamanda iti cybercrime, economic sabotage, ken panaglabsing iti Nigerian Immigration Laws.
Pinasingkedan ti DMW a dagiti nasao a Pilipino ket na-recruit nga agbiahe idiay Nigeria manipud Dubai, United Arab Emirates (UAE) nga agus-usar iti tourist visa.
Namatida a maproseso dagiti permit da inton makasangpetda idiay Nigeria.
Inlawlawag ti DMW a saan nga ipalubos ti gobierno ti Nigeria ti agpa-convert dagiti tourist visa para iti employment, ken sakbay nga agtrabaho idiay Nigeria, kasapulan a makaala iti Subject to Regularization (STR) visa manipud iti Nigerian Embassy iti Pilipinas.
