Kinarit ti Makabayan Bloc babaen iti panangidaulo da ACT Teachers Rep. Antonio Tinio ken ni Kabataan Rep. Renee Co ni Presidente Ferdinand Marcos Jr. a rugianna ti mangisayangkat iti lifestyle check iti bagina kas paset iti kampanya kontra korapsion.
Segun kadakuada, saan a makanay a maidalan iti lifestyle check ti sabali nga opisial idinto a saan a nalawag ti baknang ti pamilia Marcos ken naulimek iti bukodna a Statement of Assets, Liabilities, and Net Worth wenno SALN.
Binabalaw pay ti grupo ti administrasyon gapu iti mapapati a kaawan ti transparency, iti baet ti binilion a pisos a confidential ken intelligence funds nga iggem ti Office of the President a saan a dimmalan iti regular audit.
Patienda a no napasnek ti presidente a manglaban iti korapsion, nasken nga agbalin a modelo ken umuna a dumalan iti lifestyle checking.
