VIGAN CITY- Imon ti patien dagiti otoridad a rason iti panangtagbat ti suspek a ni Pedro Rodillas, agtawen ti innem a pulo ket pito ken taga Pudoc,San Vicente kenni Johnny Pilien ,agtawen ti innem a pulo ket tallo, naasawaan, tricycle driver ken taga Quimmarayan, Bantay idiay Bayubay Sur, San Vicente.
Segun kenni San Vicente municipal police station chief of police Jose Dingayan, maibasar iti imbestigasyon, kalpasan nga indissaag ti biktima ti pasahero na a nobya ti suspek idiay Barangay Pudoc ken kinomprontar isuna ti suspek ngem pimmanaw ti biktima.
Nupay kasta ket sinurot ti suspek ket idi nagsardeng ta mangisakay kuma ti pasahero, ditan a tinagbat isuna ti suspek babaen ti samurai a nakatamaan ti takyag na isu a dimsaag iti lugan ket immadayo ngem kinamat ti suspek ket tinagbat na manen ngem insarapa ti biktima ti dakulap na.
Inpakammo ni Dingayan a pagim-imonan ti suspek ti biktima ta masansan nga itulod na ti nobya na ngem inlawlawag ti biktima nga awan ti relasyon da no di ket agam-ammo da laeng.
Naipaagas ti biktima idiay San Vicente Rural Health Unit idinto a nakemmeg ti suspek ket maisagsaganan ti kaso kontra kenkuana.
