Dead on arrival iti ospital ti maysa a lalaki kalpasan a napaltogan bayat iti kaaddana iti maysa a gasolinaan idiay Barangay Cabalanggan, Bantay, Ilocos Sur itay alas singko y media iti bigat, October 1, 2025.
Ti biktima ket agtawen iti uppat a pulo ket walo a taga-Barangay Sinabaan, Bantay idinto a saan a nabigbig dagiti dua a suspek a naglugan iti color blue a Mio motorcycle.
Iti pannaki-uman ti Bombo Radyo Vigan ken ni PCpt. Donaldson Pagalanan a hepe iti Bantay Municipal Police Station, napan naggasolina ti biktima iti Seaoil Gasoline Station iti nasao a barangay idin ta sinaruno dagiti dua a suspek a nakamotorsiklo ket bayat a nakatallikod ti biktima, isu iti panangpaltog kenkuana ti backrider iti mamin-uppat a daras.
Segun ken ni Pagalanan, nagsagaba ti biktima iti multiple gunshot wounds isu a naipan iti Metro Vigan Hospital babaen kadagiti nagresponde a pannakabagi ti linteg ngem saanen a nakalasat idinto a naglibas dagiti suspek a nagturong iti amianan a direksyon.
Kinuna ni Pagalanan a mapapati a caliber 45 a paltog iti naaramat iti krimen.
Naammoan nga idi kallabes ket nairaman ti biktima iti maysa a pammaltog ngem saan a napilaan iti kaso isu a kitkitaen dagiti otoridad nu posible nga adda pakainaigan iti nasao a pasamak.
Iti agdama ket manarimaan pay laeng iti imbestigasyon ken panangduktal no ania iti motibo iti nasao a pammaltog.
Nagpanawagan ni Pagalanan kadagiti umili nangruna kadagiti nakakita kadagiti suspek nga ipakaammo kadakuada tapno maipaayan iti hustisya ti biktima.
Palagipna pay a liklikan a mairaman iti aniaman a riri tapno awan iti agbalin a parikot ken saan a maisagmak.
