Natay ti maysa a lalaki kalpasan a napaltogan iti asideg iti Capangdanan Elementary School idiay Barangay Capangdanan, Bantay, Ilocos Sur itay malem, June 4, 2026.
Ti biktima ket agtawen iti tallopulo ket tallo nga agnaed idiay Barangay Rugsuanan, Vigan City idinto a ti suspek ket saan a nabigbig.
Segun ti maysa a residente iti nasao a barangay, bayat iti panangigalotna iti bakana iti mapatta-patta a sangagasut a metro iti bagatan a laud iti nakapasamakan iti insidente ket nakanggeg iti kanalbuong iti asideg iti pagadalan ket idi napan, isun ti pannakakitaba ti biktima a dara-dara a nabaliktaden manipod iti motorsiklona nga orange/black Yamaha Aerox.
Insigida a nagpaarayat ti nasao a residente kadagiti kameng ti Bantay Municipal Police Station isu a dagus a nagresponde dagiti otoridad.
Naipan ti biktima iti Northside Doctors Hospital idiay Barangay Guimod, Bantay ngem naideklarar a dead on arrival.
Agtultuloy iti imbestigasyon dagiti otoridad maipanggep iti nasao a pammaltog.
