Maysa a lalaki iti nasarakan a natay iti maysa a pagtaengan idiay Barangay 5, Vigan City, Ilocos Sur.
Ti natay ket naammoan nga agtawen iti uppat a pulo ket siam, awanan ti trabaho, naasawaan nga agnaed met laeng iti nasao a barangay.
Iti pannaki-uman ti Bombo Radyo Vigan ken ni PLt. Col. Reynaldo Mendoza Jr. manipod Vigan City Police Station, nakaawatda iti report mainaig iti pannakasarak ti bangkay ti lalaki isu a nagrespondeda ket isun ti pannakakitada ti bangkay iti maikadua a kadsaaran iti nasao a pagtaengan.
Segun ken ni Mendoza, iti baet nga adda agnanaed iti nasao a pagtaengan ket bedridden ti senior citizen isu a saanna nga ammo a nagin-inom ti biktima nga isu ti mapapati a rason ti nakatayanna ta adu iti nasarakan a bote iti arak a mapapati nga ininomna.
Naammoan a ti nasao a pagtaengan ket nadlaw dagiti agpatpatrolya a polis a kanayon a nakalukat isu a patienda nga uray saan a kabagyan ti biktima iti akin-kukua ket isun ti nakasanayanna a pappapanan nu aginom.
